Archivo de la etiqueta: N’asturianu

Verdá III

Soi tolo mesmo una y otra vez:
agua, lluz, solombra, fríu.
Vesme llegar y vesme una y otra vez,
un espeyu, una copia, un recuerdu.

Equí toi
y nun soi yo; y soilo
– el d’ayeri, el de güei,
mañana yá falaremos-
una vez y otra. Y el reló nun para.

Voi a los bares atristayaos del barriu,
onde fui neñu mercando llambiotaes,
onde soi solombra y fríu,
onde espurro les manes y nun garro’l futuru.

Apagaron la lluz. Fuera, orbaya.
Dientro va tiempu que ta too moyao.

Anuncios

Deja un comentario

Archivado bajo Uncategorized

Exerciciu d’aniciu

Malapenes-y queda un fervor.
Ruempe como ruempen les families,
testigues del pasu del tiempu.

Esto nun ye pa nós,
dices. Curiosamente, sorrío
y la mio sorrisa estráñate.

Qué raru yes.
Y la puerta ruempe n’estielles de silenciu.

Deja un comentario

Archivado bajo Uncategorized

L’árbol del xardín

Hai un árbol nel xardín.
Foi semiente y
surdió ensin saber quién diba ser.
Les rames medráron-y acolumbrando’l cielu
ensin dexar d’escaecer la gravedá de la tierra.
Espoxigó,
fonte de vida,
y per un tiempu dionos fruta tienro.
Un día dímonos cuenta
de la verdá qu’esiste en nós:
el tueru afitó la realidá,
la medrana rompió-y les coraes
y la salvia buscó de nuevo’l cielu.

Agora,
hai un árbol muertu nel xardín.
Nun-y llate’l corazón,
los sos brazos, los que-y queden,
tán más cerca del suelu que de les ñubes;
pero les raíces aínda lu llanten nel mundu.

Deja un comentario

Archivado bajo Uncategorized

Verdá II

Busco nel recuerdu
imaxes pa escaecer:
tolos pronomes qu’afitaron esperanza,
el desagospiu d’un corazón,
promeses que quedaron nel aire.

Pongo enfotu. Yá nun tán.
Yá nun son.
Yá nun soi.

Deja un comentario

Archivado bajo Uncategorized

Verdá I

L’home tien soledaes que nun puede evitar.
La tienra verdá apura nos llabios
una mazcarita, una dubia:
¿y si nun somos el viaxe que suañemos?,
¿y si yá nun hai momentu pa baxar?

Deja un comentario

Archivado bajo Uncategorized

La zrezal

La zrezal yá nun da más solombra,
pero entá ye branu.
El tueru ye refuxu de mures,
montaña de formigues,
mar de mofu.

Agora sentámonos nel tueru
a lleer. Enantes,
facíamoslo na solombra.

Yera vida,
pero agora dala.

Deja un comentario

Archivado bajo Uncategorized

Toles nueches

Nin taxis mariellos
nin mou Woody Allen.
Lo que sé de Nueva York
díxo-ylo un pastor a Llan de Cubel.
Nunca quiximos
pisu grande,
namás un pisu;
nunca quiximos el mundu,
pero sí viaxalu;
nunca quiximos repetinos
y equí tamos
-yo digo pallabres ensin xacíu,
tu emocióneste con La gran belleza-,
repitiéndonos cuando nos vemos,
repitiéndonos pa sabenos aínda meyor,
aínda más fonderos.

Nunca quiximos Nueva York,
pero sí sofá con perru,
un vinilu de Van Morrison
-mou Alfredo González-
y un áticu. Y repetímonos
lo muncho que nos queremos,
y repetímonos cuando nos vemos,
repitiéndonos pa sabenos aínda meyor,
pa sabenos aínda muncho más.

¿Repítome?

Y quiero repetite
toles nueches.

Deja un comentario

Archivado bajo Uncategorized